الصفات الاربعون التي يجب معرفتها قبل الارتباط بمعماري

من كنابات دكتور سامر السيارى
الصفات الاربعون التي يجب معرفتها قبل الارتباط بمعماري
40 صفة لازم تتعرفي او تتعرف عليها قبل ما ترتبطوا بمعماري أو معمارية

طالما قررتوا تدخلوا العالم الموازي اللى المعماري بيعيش فيه وما تنساش دايما مأعده الله للصابرين من جزاء :-))))

1-احنا بطلنا نمسك المسطرة الT من زمان أوى على فكرة (الله يخرب بيت التلفزيون اللى فهمكم كدة)
2-لازم تشوفى اوضة خطيبك المعماري لأن دة حيفهمك كتير عنه كأنسان بوهيمي
3-بيتكم لازم يكون فى كل ما يلزم لاعداد كل انواع القهوة
4-عادى جدا لما تلاقية 3 أيام مش بينام (مش كائن فضائي ولا حاجة)
5-لما تسأليه عن لوحة فنية حيقعد يفتي كتير وهو مش عارفها بس هو ممكن يكلمك فى اى نوع فنون عشان عندة ثقافة كبيرة ده غير انه بيعرف يفتي فى أى حاجة
6-أغلبهم بيعرفوا يلبسوا كويس وبيكونوا شيك وبالنسبة للشباب لازم تشوف خطيبتك وقت تبييض المشروع الأول وممكن جدا ما تتعرفش عليها بسهولة فى الأول
7-بيحب يرتب هدومه وكتبه وكل حاجته (ده لو رتبها عموما) على حسب اللون
8-عايزة تكسبي قلبه أقعدى اشكري فى شغله وتصميماته العبقرية حتي لو ده مش صحيح ولو لقيتي واحدة باعتاله اعجاب على شغله ...كدة تبدأى تقلقي
9-لو قعد يرسم اسكتشات على ضهر ورقة فى الكافية اعملي نفسك منبهرة وصممي تاخد الاسكتش ده (هتفرق كتير فى علاقتكم)
10-بينسى ويسقط مواعيده وممكن يقعد يوم فرحه يتفرج على فيديو تعليمي للفوتوشوب
11-بيشيل مسئولية كويس أوى من اللى شافه فى 5 سنين فى الكلية
12-بيتحرك دايما فى اخر لحظة وبيعرف يتصرف فى الأزمات
13-مش بيستسلم بسهولة لصعاب الحياة أبدا وده يطمنك على مستقبلكم
14-بيصمم على رأيه جدا جدا (ده كان متعود يدافع عن شغله عشان ينجح)
15-المعماري مش غني (مش عارف بتجيبوا الفكرة دي منين)
16-عادى جدا لما يكون قاعد معاكي ويهتم بشكل الكرسي أو السقف اكتر منك
17-يحبوا يسمعوا مزيكا كتير بالليل (لازم تشتريله سماعات عشان تعرفي تنامي)
18-ابعدي عنه تماما لما يكون عنده تسليم وغالبا البيت هيحتاج تنظيف بعد التسليم
19-تبقي تسألي عليه من بعيد لبعيد هو عنده تسليم
20-عادي جدا لما فى وسط الليل تلاقيه سايبك وقاعد بيعمل رندر مثلا (هتعرفي يعني ايه رندر بعدين)
21-هتلاقي نفسك اتعلمتي حاجات عمرك ما كنتي تعرفي انها موجودة اصلا زى اوامر الاوتوكاد والماكس
22-ما تصدقيهوش بسهوله فى الخطوبة لو عجبه لبسك غالبا بيجاملك بس
23-بلاش تحاولي ترتبي مكتبه عشان علاقتكم تستمر
24-لو ما ردش على الموبيل بلاش تقعدي تتصلي به كل 3 دقائق ..هو هيكلمك تانى فى خلال 3 أيام
25-بتجيله حالات احباط واكتئاب ولو بنت هتلاقيها كتير بتعيط من غير سبب (مش محتاج تروح لدكتور نفساني ولا حاجة) تاني يوم الصبح ممكن تصحي على صوت ضحك من غير سبب برضة
26- لو بيسهر فى الشغل كتير صدقيه..ده مش معناه انه بيقابل بنت تانية
27-بلاش تتجوزى معماري لو انت كمان معماريه (هيكون فى صدامات على حاجات تافهه كتير زى لون الملايات أو شكل كوبايات المطبخ)
28-المعماري اللى بيتجوز مهندسة ديكور بيعشوا كويس مفيش مشاكل
29-بيتكم مش شرط يكون معمول فيه ديكور كتير (باب النجار غالبا ما بيكون مخلع)
30-وقته على طول ضيق ومشغول دايما
31-أغلب المعماريين مش بيحبوا البيت بتاعهم يكون كلاسيك
32-كل فترة جيبيله هدية زى ماوس جديد, طقم الوان , قلم غالي (الحاجات دي بتفرق معاه)
33-بيحب السفر اوى والكاميرات الديجيتال وأجهزة اللاب توب
34-ممكن يسيب شغله عشان يعلم عياله ازاى يرسموا وهيهتم اوى بالموضوع ده
35-فى حاجات كانت قبل كدة فى حياتك عادي...دلوقت مش هتكون عادي..زي الكورنيشة دى طراز اسلامي ازاى تتحط مع طقم صالون فرنساوى؟؟!!
36-بيقعد على اللاب توب بتاعه اكتر ما بيقعد معاكي؟؟ اتعودي بقى انتي لسة شوفتي حاجة
37-بيتنرفز أوى لما يشوف حد بيمثل دور مهندس معماري في فيلم عربي ويقعد ينتقد فيه
38-هتلاقية فرحان اوى وبيبصلك بطرف عينه لما يشوف حد بيمثل دور مهندس معماري فى فيلم أجنبي
39- كائن حساس, عصبي, حنون, مجنون (كل الناس بتقول كدة) بس مسئول
40-حياتكم هتكون كلها مغامرات وفيها أكيد خناقات بس الخلاصة عمرك ما هتندمي على هذا الارتباط

» الصفات الاساسية لمواد البناء
» الصفات التي يجب أن تمتاز بها سلالة إنتاج اللحم فى الدجاج
» أجمل الصفات
» اجمل الصفات‏
» الصفات الحسنة مترجم